Lətifon

“Xanım ....., xanım.....”

1990-minə soron sıvtədə bə Iron tojə şe-omə bino bəbe. Qləy nimsinnə Viyənıjən şedə bə İron, şanqo qıləy İronıji kədə mandə. De kə soybi tosə ruj obe sıbət kardən. Viyənıj fik doydəki ın ironıj deştə jeni de ədəb-ərkanı qəp jəydə. “Xanım, boəməro qıləy çay biyə”, “xanım, zəhməte, ımoni bıbə”, “xanım..., xanım...”.

Hıte vaxt omedə, viyənıj hıte zındəni, hejo ıştə fəğırə jeni fiki kardedə, votedə; kəxobi kinəm kıştə, tosə isəmən bəy SIPƏ KİNƏsən fərə sıxanım votəmni. Maşdənəy dəro qınedə, omedə bə kə. Roədə bəştə sıxan doydə ki, azən həni de jeni çok suluk bəkam. Şanqo çımi şuədə bə kinon, xışəvandon, hamsiyon omedən bə şəvnıışt. Kə pure de odəmi, ımən İrondə vindəyonko qəp jedə. Bə ikərə ironıji “xanım....., xanım..... “ bəçəy yod dəşedə. Oqardə bəştə jeni votdə ki, “Ənivəs xanım, bə kinon bıvot, bıdə çəmə çayon dəqişkən”. Jen ın sıxani məsedə, vitdə bə tənyəsə, bə kinon votdə ki, İronədə bəşmə dədə sə həvo omə, damandə çı şuə votəyon bo kinon qəp jəy. Çımi qəv bə aş omedə, çay yodo beşedə. İ kərən çı merdi zikkə məsedə: - Kinə, ıştı dədə de sıpon dərıvo, çay konco mande? Bəvədə jeni diənon sıredən. Votdə: - Aaa şık bə Xıdo, çımı dıl təkəbe ki. İnşalla çəy ağıl oməy bəçəy sə.

Hırsə ləvəngi

Bə qıləy lankoniji kə çı Boku mehmon omedə, ın mehmon moy vindedə, votedə ləvəngi bıkən, kijə vindedə, votedə ləvəngi bıkən. Mılxəs, lankonıj ıştə mehmoniən peqətedə, şedən bə neçiəvonəti. Çı kijə, çı həyvon jəydən, mehmon votedə ki, ımi ləvəngi bəkardemon. Bı əğdəm qıləy yolə hırs beşedə bəçəvon və, bokuj tufanqi rost kardedə ki, hırsi bıjəno, qullə bə hırsi qınedəni, lankonıj ıştə dılədə votedə: - Çok be qullə bə hırsi nıqıni, ənnə vizi çıkono əvəymon?

Dəxlış ni...

Qıləy likij penıştə bə Boku-Lik avtobus, bə şoferi nez nıştedə, xəyli sıbət kardedən, likij sıbəti əsnodə çı şoferiku parsedə ki, kovrəyje, çiki zoəye, şoferən votedə: Liki fılonə diku, çı Ağamamu zoəm, likij tikəyən bə şoferi nez bedə, votedə: - Votedəm xo, ovı bəmı şin omedə, ıştı pə çımı xalazoəye.... Şoferən dınyovində odəm bedə, çı likiji sıxanii nimədə bırnedə: - Mamu, ın avlodəti bə ro kirə hiç dəxlış ni ha....

Dəvuş

“Tolışon Sədo” N58 22 dekabr 2013-minə